काठमाडौं । नेकपा एमाले युवा विद्यार्थी विशेष जिल्ला कमिटी सचिवालय सदस्य धर्मराज तिमिल्सिनाले त्रिभुवन विश्वविद्यालय (त्रिवि) का विभिन्न नियम तथा प्रशासनिक प्रणालीमा रहेको कमजोरीप्रति गम्भीर ध्यानाकर्षण गराएका छन् ।

उनले त्रिविका उपकुलपतिलाई ज्ञापनपत्रमार्फत त्रिभुवन विश्वविद्यालय संगठन तथा शैक्षिक प्रशासन नियम २०५० मा अघिल्ला संशोधनहरू बेपत्ता पारेर हालै प्रकाशित गरिएको नियमावलीप्रति आपत्ति जनाउँदै ऐतिहासिक तथा कानुनी विकृति सच्याउन आग्रह गरेका छन् ।

तिमिल्सिनाले त्रिवि शिक्षक–कर्मचारी सेवा सम्बन्धी नियमावली २०५० मा महिलाको लागि उल्लेख गरिएको २३ प्रतिशत आरक्षणलाई बढाएर ३३ प्रतिशत पु¥याउनुपर्ने माग समेत राखेका छन् ।

स्ववियु (स्वतन्त्र विद्यार्थी युनियन) सम्बन्धी विषयमा पनि उनले सुधारको आवश्यकता औंल्याउँदै, विद्यार्थी संगठनको चुनाव चिन्ह लिएर निर्वाचित भए पनि संगठनविरुद्ध काम गर्ने, अनियमितता गर्ने वा भ्रष्टाचारमा संलग्न हुने व्यक्तिलाई कारबाही गर्दा पद स्वतः रिक्त हुने व्यवस्था गर्नुपर्ने सुझाव दिएका छन् ।

त्रिवि अन्तर्गतको परीक्षा नियन्त्रण कार्यालयको कार्यशैलीमा समेत सुधार आवश्यक रहेको भन्दै तिमिल्सिनाले प्रशासनिक ढिलासुस्ती, पारदर्शिताको अभाव र सूचना प्रवाहको कमजोरी हटाउन उपकुलपतिलाई सुझाव दिएका हुन् ।

ध्यानाकर्षण पत्रमार्फत तिमिल्सिनाले त्रिविलाई शैक्षिक मर्यादा, समावेशिता र जवाफदेहिताको मार्गमा अग्रसर गराउन थप कडा र प्रभावकारी कदम चाल्न आग्रह गरेका छन् ।