काठमाडौँ । राष्ट्रिय स्वतन्त्र पार्टीका वरिष्ठ नेता बालेन्द्र साहले रास्वपाले संघीयतालाई अझ बलियो बनाएर लैजाने बताएका छन् ।

जनपुरधाममा पार्टीले आयोजना गरेको कार्यक्रमलाई सम्बोधन गर्दै उनले यस्तो बताएका हुन् ।

उनले प्रदेशको काम अझ राम्रो र बलियो बनाउने आफूहरूको उद्देश्य रहेको बताए । जनकपुर मधेस प्रदेशको राजधानी भए पनि अधिकारका लागि काठमाडौँ धाउने गरेको आफूले देखेको र महानगरको प्रमुख हुँदा मूकदर्शक मात्रै बनेको बताए । उनले काठमाडौँ अधिकार माग्न नभई घुम्न मात्रै जाने स्थिति निर्माण आफूहरूले गर्ने बताए ।

उनले भने ‘म जनकपुर आएपछि धेरैले भने राष्ट्रिय स्वतन्त्र पार्टीको संघीयताप्रतिको धारणा के हो ? प्रदेश अझै बलियो बनाउँछौँ । प्रदेशको काम अझ राम्रो बनाउनेछौँ । जनकपुर प्रदेशको राजधानी हो । काठमाडौँ कामका लागि किन धाउने ? संघीयतालाई अझ बलियो बनाउने गरी हामी लाग्नेछौँ । काठमाडौँ अधिकार माग्न जाने होइन, घुम्न जाने हो । अधिकार माग्नका लागि काठमाडौँ जानुपर्ने बाध्यता हटाउनुपर्छ ।’

उनले चार वर्ष काठमाडौँ महानगरपालिकाको मेयर भएर काम गर्दा भाषण दिने फुर्सद नभएको बताए ।