काठमाडौं । जिल्ला अदालत भक्तपुरले ज्यान मार्ने उद्योगसम्बन्धी मुद्दामा पक्राउ परेका चक्रे मिलन भनेर चिनिने मिलन गुरुङलाई १ लाख १० हजार रुपैयाँ धरौटीमा रिहा गर्न आदेश दिएको छ ।

शुक्रबार न्यायाधीश रामप्रसाद न्यौपानेको इजलासले धरौटीमा रिहा गर्ने आदेश दिएको जिल्ला अदालत भक्तपुरकी सूचना अधिकारी हिराकुमारी भण्डारीले जानकारी दिइन् ।

सरकारी वकिलको कार्यालय भक्तपुरले चक्रे मिलनविरुद्ध मनिष रायमाझीमाथि खुकुरी प्रहार गर्न लगाएको आरोपमा ज्यान मार्ने उद्योगअन्तर्गत मुद्दा दायर गरेको थियो ।

२०७८ भदौ १० गते मध्यपुर थिमि नगरपालिका–२, सानोठिमीस्थित एक रेष्टुरेन्टमा रायमाझीमाथि खुकुरी प्रहार भएको घटनामा मिलन संलग्न भएको आरोप छ । घटनामा संलग्न भनिएका अजित खवासलाई प्रहरीले यसअघि पक्राउ गरेको थियो । उनी हाल सफाइ पाएर छुटिसकेका छन् ।

मिलन गुरुङले भने आफूमाथि लागेको आरोप अस्वीकार गरेका छन् । उनले सरकारी वकिलको कार्यालयमा दिएको बयानमा मनिष रायमाझीलाई चिनेकोसमेत नदेखिएको दाबी गरेका छन् ।

उनले आफूले अजित खवासलाई पनि नचिनेको, र पूर्वयोजनासहित कसैलाई आक्रमण गराउने कुरा निराधार भएको बताएका छन् । उनले घटनामा शंकाकै भरमा आफूलाई तानिएको दाबी गरेका छन् ।

यसअघि काठमाडौं प्रहरीले साउन १५ गते मध्यराति महाराजगन्जस्थित एक स्थानबाट चक्रे मिलनसहित १९ जनालाई जन्मदिन मनाउनेक्रममा होहल्ला गरेको आरोपमा पक्राउ गरेको थियो ।

त्यस सम्बन्धी अभद्र व्यवहारको मुद्दामा जिल्ला अदालत काठमाडौंले उनलाई ३० हजार रुपैयाँ धरौटीमा रिहा गर्न आदेश दिएको थियो ।