काठमाडौं । निर्वाचन आयोगले प्रदेश सभा तथा प्रतिनिधि सभाका दुई क्षेत्रमा कात्तिक १७ गते उपनिर्वाचन गर्ने निर्णय गरेको छ । मनाङको प्रदेश सभा क्षेत्र नं. २ र रूपन्देहीको प्रतिनिधि सभा क्षेत्र नं. ३ मा एकै दिन उपनिर्वाचन हुने भएको हो ।

२०७९ सालको मंसिरमा सम्पन्न प्रदेश सभा निर्वाचनमा मनाङ क्षेत्र नं. २ बाट स्वतन्त्र उम्मेदवार राजिव गुरूङ (दीपक मनाङे) विजयी भएका थिए ।

तर, चक्रे मिलनमाथि ज्यान मार्ने उद्योगको अभियोगमा सर्वोच्च अदालतले उनलाई दोषी ठहर गर्दै जेल सजाय सुनाएको थियो । त्यससँगै अदालतले उनलाई गण्डकी प्रदेश सभा सदस्यको हैसियतमा अयोग्य ठहर गरेको थियो । यसै कारण खाली बनेको सो क्षेत्रमा अब उपनिर्वाचन हुन लागेको हो ।

यस्तै, रूपन्देही क्षेत्र नं. ३ मा राप्रपाका सांसद दीपक बोहराको निधनपछि प्रतिनिधि सभा सदस्यको पद रिक्त भएको हो । निर्वाचन आयोगले दुबै क्षेत्रमा कात्तिक १७ गते उपनिर्वाचन गर्ने निर्णय गरेको छ ।

निर्वाचन आयोगले सम्बन्धित निर्वाचन क्षेत्रका तयारी तीव्र बनाइसकेको जनाएको छ ।