काठमाडौं । अछाममा रजस्वलाका बेला त्रिपालमुनि सुतिरहेका बेला माथिबाट खसेको ढुङ्गा लागेर एक महिला र बालिकासहित दुई जनाको मृत्यु भएको छ । पञ्चदेवल विनायक नगरपालिका-८, सेलापानीमा बिहीबार राति घटना भएको हो ।

जिल्ला प्रहरी कार्यालय अछामका अनुसार, घर नजिकैको खेतबारीमा त्रिपालमुनि सुतिरहेकी ३५ वर्षीया निमा खनाल र ७ वर्षीया बालिका कविता भण्डारीको घटनास्थलमै मृत्यु भएको हो । उनीहरूसँगै सुतेकी कविताकी आमा ३६ वर्षीया रत्ना भण्डारी घाइते की छन् । उनलाई उपचारका लागि बारला स्वास्थ्य चौकी पठाइएको छ ।

पञ्चदेवल विनायक नगरपालिका-८ का वडा अध्यक्ष छत्रबहादुर शाहीका अनुसार, निमा खनाल र रत्ना भण्डारी दुवै जना महिनावारी बार्नका लागि घरबाहिर त्रिपालमुनि सुतेका थिए । महिनावारी भएका बेला घरभित्र बस्न नहुने अन्धविश्वासका कारण उनीहरू जोखिमपूर्ण अवस्थामा रात बिताउन बाध्य भएका थिए । रत्नाकी सात वर्षीया छोरी कविता आमाको माया लागेको भन्दै सँगै सुतेकी थिइन् । मृतक खनाल र भण्डारी दुवै जना माइत आएका बेला घटना भएको वडा अध्यक्ष शाहीले बताए । 

पहाडी भेगमा वर्षायाममा माथिबाट ढुङ्गा खस्ने वा पहिरो जाने सम्भावना अत्यधिक हुने भए पनि छाउपडीजस्तो कुप्रथाका कारण महिलाहरू जोखिम मोलेरै भए पनि असुरक्षित ठाउँमा बस्न बाध्य छन् । सरकारले छाउपडी प्रथालाई गैरकानुनी घोषणा गरी दण्डनीय बनाए पनि यसको पूर्ण उन्मूलन हुन सकेको छैन । प्रहरीले घटनाबारे थप अनुसन्धान गरिरहेको जनाएको छ ।