काठमाडौँ । भ्रष्टाचारको मुद्दा सामना गरिरहेका सुदूरपश्चिम प्रदेशका पूर्वमुख्यमन्त्री तथा नेकपा (एकीकृत समाजवादी) का सांसद दीर्घबहादुर सोडारी एक लाख रुपैयाँ धरौटीमा रिहा भएका छन् ।

गैरकानुनी रूपमा सम्पत्ति आर्जन गरेको अभियोगमा सोमबार विशेष अदालतमा उपस्थित भएका सोडारीसँग विशेष अदालतका अध्यक्ष टेकनारायण कुँवर तथा सदस्यद्वय रितेन्द्र थापा र विदुर कोइरालाको इजलासमा बयान लिइएको थियो । बयानपछि थुनछेक बहस हुँदा अदालतले उनलाई एक लाख धरौटीमा रिहा गर्न आदेश दिएको हो ।

अख्तियार दुरुपयोग अनुसन्धान आयोगले ०८१ जेठ १९ गते सोडारीविरुद्ध १ करोड ८ लाख ३८ हजार रुपैयाँ बिगो दाबी गर्दै भ्रष्टाचार मुद्दा दायर गरेको थियो । आयोगको दाबी अनुसार उनले सार्वजनिक पदमा रहेकै समयमा गैरकानुनी सम्पत्ति आर्जन गरेका छन् ।

सोडारीले ०८१ वैशाख ६ गतेदेखि ०८१ साउन २० गतेसम्म सुदूरपश्चिमको मुख्यमन्त्रीको जिम्मेवारी सम्हालेका थिए । हाल कैलाली क्षेत्र नम्बर ४(१) बाट प्रदेश सांसद रहेका उनी यसअघि सामाजिक विकास मन्त्रालय तथा भौतिक पूर्वाधार मन्त्रालयको नेतृत्व पनि गरिसकेका छन् ।

अख्तियारको अनुसन्धान अनुसार सोडारीले ०७४ माघ ७ गतेदेखि ०७९ फागुन १० गतेसम्मको अवधिमा खुद बैंक मौज्दात, पारिश्रमिक तथा भ्रमण भत्ताको बचत, परिवार सदस्यको आम्दानी, कृषि तथा बैंक ब्याजजस्ता श्रोतबाट जम्मा ८५ लाख ५१ हजार रुपैयाँ वैधानिक आय आर्जन गरेका थिए । तर, आयोगका अनुसार उनको सम्पत्ति त्यसभन्दा बढी देखिएको र श्रोत खुल्न नसकेको भन्दै गैरकानुनी सम्पत्तिको आशंका गरिएको हो ।

सोडारीविरुद्धको मुद्दा अब थप सुनुवाइका लागि तोकिएको मितिमा अगाडि बढ्ने विशेष अदालत स्रोतले जनाएको छ ।